公屋冇水冇電住三年

今日放工搭火車時睇到一則新聞, 講述一對老人家三年來不用水, 不用電, 甚至cut埋煤氣, 於是房署收番佢地間屋. 房署嚴陣以待, 派出十二人, 再加警察數名, 衝入屋趕阿婆走. 阿婆誓死反抗, 高呼無理, 喊打喊殺, 記者們的閃光燈閃過不停, 阿婆感到不適, 戴著口罩然後送院. 阿公執拾細軟去申請中轉屋, 但呢段時間又有屋住.

以下純綷個人意見. 老實講我唔係好信阿婆講的野. 真係誇, 最緊要果三樣utility都冇用 -- 水電煤. 煤唔用就唔出奇, 我都用好少啦. 唔用水唔用電三年喎. 水錶就話有mechanical的設計問題, 可以"慢慢滴"唔跳錶, 加上有free allowance o者. 電錶冇得"慢慢流", 流慢d卦.... 三年都唔用水電, 唔好話2005年, 三十年前都唔得啦....... 真係深山大野人咩. 我就真係唔係好信佢住係果度.

我覺得近年的老人家愈來愈厲害. 上訴領匯, 告房委會租金超過入息中位數, 掉垃圾落街扣滿分俾人收屋, 唔用水電煤但住係間屋. "老人家喎! 點可以收佢地間屋架!" 我覺得d弱者係度濫用緊社會的同情心囉, 唔羞恥架咩? 弱者濫用或利用社會的同情心, 就唔值得同情!

但同時今日我又睇到報紙頭條, 原來香港有好多拾荒兒童. 因為家境問題, 而要拾荒, 人工才不過每小時$2.5 . 有一個小朋友才六歲, 已有一年拾荒經驗. 當時我感到很心酸. 兩個半? 我一擲$20買雜誌時, 何曾想過別人要拾荒8小時? 當我贊助遠至我都唔知佢住邊的印尼兒童讀書時, 原來香港有些兒童好不了多少. 叫他們拾荒的家長有冇想過他們的子女長大後的自我形象會幾低? 點解佢地連去秋季旅行都要儲錢一個月?

我開始覺得社會的資源真的太浪費了. 點解可以浪費咁多納稅人的錢, 俾盧少蘭上訴, 和一班議員唱戲, 做出一場一開始就知結局的戲, 但唔可以認真處理隔代貧窮?

同一時間我又係度諗, 細個我爸爸掉低家庭, 不單止向媽媽借錢, 還時不時回家打爛家具. 媽媽在別人睡覺時上班, 別人上班時睡覺, 才賺三四千元. 我還要哮喘發作, 連續看半年診所醫生. 真係窮到冇錢開飯. 但係媽媽從來冇拿綜援, 冇叫我拾荒, 淨係叫我讀好書. 我當然有個好媽媽, 但那個帶女兒拾荒一年的單親媽媽在想什麼呢?