舖頭消失了

我家附近的屋村商場, 自領匯管理以來, 愈來愈靚同乾淨. 好景不常, 最近半年, 附近的舖頭一間一間咁消失. 先是我每星期光顧起碼三次的萬寧, 搬到要行5分鐘路程. 緊接而來的, 係放工後買雜貨飯餸的大昌, 搬左入我永遠都唔去的街市. 之後, 影碟舖, 洗衣店, 麵包舖, 電器舖, 家用品店, 甚至連大集團商務印書館都要迫走.

今日放工個陣, 我如常咁去大家樂買飯盒. 點知發現係大家樂隔離的大班麵包店都消失埋, 今日下午五時係最後營業 --- 我連最後一面都見佢唔到. 我好詫異, 個心好唔舒服. 大班麵包舖係呢度已經開左十五年以上, 我細細個已經係呢度開業. 由我最初好憎佢, 到而家幾乎日日放工都買佢的麵包, 好有感情. 感情又點值錢呢? 租金一定加得好離譜! 我屋企附近, 連摺兩間麵包舖, 我以後放工後只可以去美心, 買賣剩排的排包, 或者凍冰冰的腸仔包.

而家個屋村商場仲係度裝修咁. 望住圍板, 同埋剛整好的假天花, 我突然好掛住以前更有親切感的up dup商場仔.