今時今日咁的服務態度

自從我打guild wars後, 就發現和記寬頻出海奇慢. 一打pvp就"現哂形", 呆左係度, 活生生給人打死. Pve呢? 打兩三小時的elite mission就會在個多小時後(一半之後)斷線. 再加上前幾個月無啦啦上唔到網, 咁好的服務, 係時候要轉下.

於是我去年十月頭打電話去和記寬頻要求終止合約. "小姐, 你的約到下年一月才到期wor, 我地唔可以咁早同你終止合約架. 請你十二月再打來啦." 咁我問, 係咪十二月打來就得, 有咩手續. "係呀, 十二月打番來1222, 按@#$再按1就可以的了. 請問仲有冇野可以幫到你?" 喔, 冇啦, 唔該哂.

十二月時, 有人打來問我續唔續約, 我梗係唔續啦, 順手話要cut服務. "如果而家終止合約, 係需要填番份表格再郵寄俾我地. " 咁你fax張表俾我啦. "公司規定只可以郵寄表格. 而家咁多假期, 需要兩個星期的工作天先可以寄到. 你合約到一月尾, 但我地要一月頭至寄到, 你填完再寄番, 約二月中先可以中止" 而家先十二月, 二月中咁耐? 點解唔可以fax? 你地冇fax機? 冇email咩? "公司規定只可以郵寄" 你用咩來郵寄? 要兩星期咁耐? "公司規定, 最長時間要兩個星期的工作天內寄到, 一般不用兩星期時間" 你地外判左去印度? 兩星期可以寄到美國再寄番來都得啦. "公司規定..."

成個鸚鵡咁, 我有咩計. 唯有等兩星期.

期間, 又有一個電話打來問續約. 我唔制啦梗係.

今日, 話咁快, 兩星期早已過去, 但我又事忙, 忘記左打. 今日下午番緊工, 好緊張de 緊 UAT的bug時, 電話響到.

"請問係咪X小姐? 我係和記環球電訊打黎架..." 心諗, 打得來真好, 兩星期過左啦wor, 點知...

"你係我地的長期客戶, 請問黎緊係咪會繼續支持我地呢?"

頂!!! 當時真係冒名火起. 即時發火鬧: "我咪話左cut囉, 你地仲打來做乜??? 你地寄張表寄左兩星期都未寄到, 攪乜架... 外判左去火星都唔駛咁耐呀? 間咁大的上市公司, 連email fax都冇, ...."

佢見咁的樣唔對路, 即刻話自己係宣傳部, cut服務要打番去1222直線.

好! 火都黎埋, 我就同你打去熱線度cut

一接通熱線, 即刻講件事始末, 鬧和記點樣過份, 不如俾個回郵快郵信封拒, 又或者dhl, 反正咁平, 等拒有效率d. 佢見我咁嬲, 都唔駛30秒就forward我去終止服務部.

一接通電話, 都未講任何野, 我即問服務員的全名, 我再repeat多兩次, 以示我會確實記得她. 仲問埋拒直線, 不過拒話冇直線. 跟住我就講和記幾咁冇效率, 身為間電訊寬頻公司竟然連fax, email的服務都冇, 都算啦, 仲要寄兩星期寄到無左影.

"請問邊位同事同你講要兩星期呢? 我地只需要一星期工作天..." 之前條友玩我?

我於是話: "我等左你同事好耐啦wor, 咁有冇d快捷方便d的方法?" "有! 我可以即刻fax俾你. email都得". (>u<)""~~~~~~~~~~~~~~

番到屋企check mail, 果然收到. 問CS全名果然有效. 我今晚就填左張form, 聽朝去郵局寄掛號. 要知道, email同fax都有機會寄失, 我驚和記的職員一不小心收唔到, 咁就唔好啦!